Buhseng Ramriah

Kum 2009 kum tawp lam kha nita in ka hria, Chhiahtlang ah kan u te ho nen buhseng dawn hnaih hian ram kan riak a, kha mi ṭum kha tun thleng hian ka la theihnghilh leh thei lo.

Kar tir ah riak lut turin kan insiam a, iptepuiah buhfai leh hnathawh kawr puar tawk a ak in kan chhuak ta a. A hmun kan thlen chuan Tuikum  lui luang dul dul bul mai ah hian Pâwl buk hi an lo sa a , tah chuan kan in vawm lut  ta a. Buh hmun tak chu a chhak tlângah a awm avangin hnathawh kawr te kan inbel zawh chuan hnathawk turin kan han chhuak ta a. Nilengin thlan tla khawpin kan han thawk a. tlai ah, thlasik khaw lunglenthlak tak hnuaiah luiah kan han in bual a, chumi zawh ah, kan u in a kar hmasa lam a alo ngaihtuah lawk diam, eng damdawi dang mah pawlh loh a zu bilh chu eirawngbawl pah in kan han thlawr ta ṭhin a, a nawm dan a danglam thei ṭhin khawp mai.

Ka u hian vau ah hian eng thang thang emaw hi a kam ṭeuh mai a, vawikhat chu “Nang, sakuh thang ka kam khi lo han en rawh”a tit a mai a. Phur fahran chuan ka han en chu Sakuh hi a lo awk reng mai a, chutia ka u te ka’n hrilh chuan lo puah nghalh law law rawh an ti a. Vawikhatmah Sakuh a pum a hmuh pawh la hmu ngailo ka ni bawksi, ka thiam lo han ti dawn ila tlawmngai ve tawh lak lawh si, a hmul tihfai nan mei kan chhem hluah phawt mai a(h). Ka u nupui chuan “Engatan nge i chhem?”a rawn ti, kei lah chuan “E ka rawh kâwng ang chu”kan tih chuan an nui nasa ngei mai. Khata ṭang khan Sakuh hmul hi Ar hmul pawh ang hian an pawt ṭhin tih ka hriat phah ta.

Tichuan, zanriah ei dawn hnaih ah, kan thil thlawr chhuah sa chu kan han dawm a, chaw kan han ei a chawhmeh ah Vaṭhu sa te kan han hmeh ṭhin kha chu a van lo puar theih ngai ṭhin tak. Zan a lo ni a, kan bûk chhak a riak ve te nen in rawtphur chawpin luidungah tlha eng hnuaiah lên kan han dêng a, kei a deng thiam lo ber kha chu sangha bawm leh meichher keng tu kha ka ni mai a. Luidung lah chu tlha eng chuan a en ruih mai si, a lunglenthlak thei hle. Sangha lah man tur an lo tam phian si a, thui pawh kal hma in Kg 3 velh chu kan man der a, kan han haw a Changel hnah ah kan han bun vumthur mai ṭhin kha chu lawm awm ve ṭhin tak ani.

Tunah chuan,,, electric eng hnuaiah Facebook pah in Blog te kan han update velh ta mai mai chu nia, khang hunlai kha mi te ngaih ah chuan nawm hmel vak in lang lo mahse ka tan hi chuan hun chhinchhiahtlak tak anih reng ka ring tlat ani. Engtikah tak Buhseng Ramriah na ah hian tel ve leh ang i maw?