Kan uite

Fahrah tak a lo piang in a nu leh apa te pawh a hriatchian hma a kan hnena lo awm hi ani a. A tir ah chuan min nel lo in ka bul hnaia awm te hi a inthlahrung ni hian ka hre ṭhin. Vawikhat ka bazar haw lam hian in nel deuh nan leh in pawh tlan deuh nan tiin ka neih chhun chhun in kan in ho tur Bawnghnute ka leisak a, in ka thlen chuan ka bulah ko in “Hei chhungkhat kan ni a, mihrang kan awm lo a, tlangnel taka kan bula I khawsak hi kan duh ber chu a ni a, hetia inthlahrung dek a I awm reng chuan kan tan leh I tan pawh a nuam lo ang”tih pah chuan a bawnghnute in ve tur chu a hma ah chuan ka han pe a. Ka thil hmuh chuan min ti hrilhhai hle mai, ka hmuh lai ngei chuan bawnghnute chu a chhir bua anih chu. Chumi ṭum chuan kei tak ngial pawh ka insum zo lo, kut te pawh ka thlak hial. Ani pawh chu a inthiamlo deuh ani ang, tlaiah chaw eitur a ka koh pawh in alo kal duh lo a, a room ah a tawm ta tlat a.

Mi thi lo na na na chu hun alo liam a thla hnih khat an liam chuan mi te pawh a nel ṭan chho a, kan chhungkaw min tihlimtu ber alo ni chho ta reng mai a. Ka ngaihtuah let a, a tet deuh lai aṭanga kan in a rawn awm ve chiah ni si, a tir a min ti beidawngtu em em ni si hetia kan chhungkaw hlimna thlen ber tu alo ni ta mai hi mak ka tiin lawmawm ka ti. Mahse famkim lohna khawvelah hi chuan tumah hi a famkim theihloh tih hi alo dik kher mai. Vawikhat chu ruahsur lai hian khawlai diak nen, “Ruahsur lai leh khawchhiat lai chuan leng chhuak lo la, hei inchhung te a diak duh avangin mahni in lama tawm hi a ṭha ngai e”ka han ti a, ka thusawi pawh chu hremiah lo ang mai hian a chhuak a, arawn haw leh chuan kan cushion ah ngei mai a lawn tharh mai chu thin asa duh ngei mai.

Kan in a tlema a tlangnel deuh tak leh a in ang maia a khawsak chhoh tak ah chuan kei pawn ka theih ang angina ka duat ve ṭhin a, keini chhung hi chhun lamah in lama kan awm ngai loh avangin in nghak ah hian kan ring chawt a, kan chhuak tur hi step thleng min thlah thlap in kan haw lamah step bulah bawk min lo hmuak leh ṭhin. Step a kan haw min han hmuh hi chuan mi a thlakhlelh tawh zia hi a hriat thei mai ṭhin, kan hmel a hmuh a a lawm ṭhin zia te kha.

Tihian ka ngaihtuah a, Pathian zarah in sa lai te kan ni a, kan insak te kan zawh hunah chuan room te pawh tlem a nuam deuh in leh mutna te pawh nuam deuh in kan siamsak anga tiin. Mahse, nimin piah tlai hnathawhna aṭanga ka haw chu min lo hmuak ta miah lo mai. Ka rilru te te in, “A leng anih dawn hi”ka ti mai a. Zanriah ei alo hun a nidanga chaw eisiam laia lo buai ve em em ṭhin kha alo lang ta miah lo mai. A chaw tur pawh kan siam sak a, nakinah alo haw hunah ei mai rawh se kan ti mai a, ngaihthat lohna pawh nei chuang lovin chaw chu kan ei ta a.

Zan alo ni a, a thawm a reh tak em avang chuan, ka ngaihṭha lo chuan khumhnuai velh kan en chuan ka thil hmuh chuan min ṭhawng ngei mai. Kan uite, theih ang tawp a kan duat ve ṭhin “Poppy”ti a kan koh chu chau hmel em em mai hian khumhnuaiah luak nen a lo sawp niaih mai le. Ka pawm chhuak a, kan en chian chuan a mitmeng te chu a dik tawh lo. Ka ṭhianpa, vety doctor ka phone nghalh a, ani chuan “Hrileng pangngai anih dawn chu, naktuk lamah lokal la kan en dawn nia”a ti a. Mahse, a hnu deuh ah chuan thi in a rawn luak ṭan ta, ka ṭhian pa ka phone leh a awm dan ka sawi chuan “Sazu tur a ei ani lo maw, mi in sazu an hrai anga, chumi sazu thi chu a ei aniang, naktukah local ngei ngei la, kan jection dawn nia “tiin in min hrilh ta a. Ngaihṭhatlohna em em pawh nei lo chuan a khumah ka dah a kan mutsan ta a.

A tuk zing khua a lo var chuan ka han en a, nizan lam ai chuan a a chau lo zawk anih hi ka ti a, bual fai ila entir ila tha ang tiin a bualna chu ka siam a ka bual ta a. Chutia ka bual zo ka hru hul a nilum kana i tir chuan thi khar in a rawn e leh ta. Ka mangang chuan ka ṭhianpa ka phone leh, chuta a thil min hrilh chuan min va ṭhawng take m! “A pumpui a chhe tawh anih chu, kan chhan thei tawh lo ang. Tikhan a thih hun nghah I duh loh chuan tihhlum mai angai ang”a rawn ti ta. Thla nga bawr velh kan lo inhrawn ve tawh a, min ngaina a, ani pawh kan ngaina ani. A na tuar chuan min rawn en ṭawk ṭawk ṭhin a, patling meuh pawh patling nih alo har anih hi. A khur a, min en a, tih theih dang ka nei tawh si lo. Ngaihdan ka siamfel ta, hetia na tuar a dah reng ai chuan tiin ka tihhlum tir ta. Kan nu phei chu ṭah tak takin a ṭap a, keipawh ka intipachang a mittui tlak loh chu a har ngei mai. Tichuan, kan chenpui, chaw kan eipui ṭhin, midang te tana Ui satliah mai chu lei ah kan phum ta. Heta tang hian ui vulh hi chu ka sim chiang ta khawp mai.