Ka Lawm E Lalpa

Kan khum bul thingrem chhung a whisky um khat ka dah chu lakchhuah pah chuan ka no hman thiam Rial no ngei mai chu ka ban pah nghal a. Ka thli a, tui ka pawlh a ka tlak pawp a chutiang chuan a zawn zat in vawi li lai ka ti ta a. Ka ngaihtuahna chu a kal ding ngut ngut a, mahse ka enghelh em em hran lo. Sunday tlai a ni a, ka nupui chuan rawng a bawl a, ka fate erawh TV en in an hmanhlel thung a. Kei Pa ber erawh Room lamah ka in tui tuah mek a. Ka Phone a ri a, ka kekawr ipte atanga phawrh pah chuan ka en zuai a, Whatsapp ah chuan ka mi hriat chian em em mai chuan “Bawih, 2nite chu aw” tih zawng hi a rawn type a, ka reply lo, mahse ka chiang.

Zanriah kan eikham a, ka inbual a, ka insiam a. Perfume ka in kap a, ka jacket ka hak pah chuan kan khum sir a ka bike chabi ka khai chu ka ban nghal a. Ka chhuah pah chuan ka nupui TV lo en bulah chuan “Ka thianpa damlo a, damdawiin ah ka va kan ve ange” tih pah chuan ka chhuak nghal a, a chhanna ka nghak hman tawh lo. Thudik hrilh turin huaisenna ka neilova, ka ngaihzawng hmu tura chhuak ka ni tih hi hrilh a tul ka ti lem lo.

Inkhawm kal tur hel hram hram chung chuan ka in khalh phei a. Ka theihnghilh ka hrechhuak ta. Ka wallet. Ka pocket money ka dahna leh Condom ka dahna kha. Ka in turn a ka kir leh a, kan in chu zawi muangin ka pan a, ka kal zel a. Kan in thlen hma deuh chuan ka bike chu ka dah a. Ngawi rengin inah ka lut a, ka wallet ka dahna room lam pan chuan ka kal a. Chhuah leh nghal tum ka ni. Ka wallet chu ka la a, ka chhuak tur chuan Sitting Room lama ka fanu zai ka hre ta. “ Hmangaihna in min hruai thin, Chhungkaw duhawm min pe, Ka lawm e Lalpa, I malsawmna vangin” tih hla kha. Ka kir leh. Ka ngaithla zel a, ka fanu chu a zai zel a. “Ka lawm e Lalpa, I Malsawmna Vangin”. Ka fanu a Zai zel a. “Chenna In tur min buatsaih, hahchawlhna tur min pe, Ei leh in tur min pe in, Silh leh fen min pe a” ka ngaithla ngam tawh lo. Ka chhuak a ka mittui a tla ta. Kei a pa neihchhun hian enge ka tihsak le. Ka in ngaihtuah ta. Ka fanu hla sak chuan min va hneh teh lul em. Kei apa heti mai maia ka khawsa chung pawh hian ka fanu chuan “Chhungkaw Duhawm min pe” ala ti thei. Ka fanu tana Pa nih ka tlin loh zia ka in hrechhuak zui. Ka bike ka la a, in lamah ka kir leh. Ka fanu chu ka pawm a. Ka mittui a tla bawk. Engmah chu ka sawi lem lo.